Numbers 3

Amadodana kaAroni

1Lezi-ke yizizukulwana zikaAroni lezikaMozisi, ngosuku iNkosi eyakhuluma ngalo loMozisi entabeni yeSinayi. 2Lala ngamabizo amadodana kaAroni; izibulo uNadabi, loAbihu, uEleyazare, loIthamari ^a. 3La ngamabizo amadodana kaAroni, abapristi abagcotshiweyo, owabehlukanisela ukusebenza njengabapristi ^b. 4Kodwa uNadabi loAbihu bafa phambi kweNkosi, lapho benikela umlilo ongejwayelekanga phambi kweNkosi enkangala yeSinayi ^c. Babengelabantwana. Ngakho uEleyazare loIthamari basebenza njengabapristi phambi kukaAroni uyise.

5INkosi yasikhuluma kuMozisi isithi: 6Sondeza isizwe sakoLevi, usimise phambi kukaAroni umpristi, ukuthi bamsebenzele ^d. 7Bazagcina imfanelo yakhe lemfanelo yenhlangano yonke phambi kwethente lenhlangano ukwenza inkonzo yethabhanekele. 8Bazalondoloza yonke impahla yethente lenhlangano, lemfanelo yabantwana bakoIsrayeli, ukuthi benze inkonzo yethabhanekele ^e. 9Njalo uzanikela amaLevi kuAroni lemadodaneni akhe; aphiwe lokuphiwa kuye bephuma kubantwana bakoIsrayeli ^f. 10Njalo uAroni lamadodana akhe uzabamisa, bagcine-ke ubupristi babo ^g. Lowemzini osondelayo uzabulawa ^h.

11INkosi yasikhuluma kuMozisi isithi: 12Mina-ke, khangela, ngithethe amaLevi ephuma phakathi kwabantwana bakoIsrayeli endaweni yalo lonke izibulo elivula isizalo kubantwana bakoIsrayeli. Ngakho amaLevi azakuba ngawami ⁱ, 13ngoba lonke izibulo lingelami ^j ngosuku engatshaya ngalo lonke izibulo elizweni leGibhithe. Ngizehlukanisele lonke izibulo koIsrayeli, kusukela emuntwini kusiya enyamazaneni; lizakuba ngelami ^k; ngiyiNkosi.

14INkosi yasikhuluma kuMozisi enkangala yeSinayi isithi: 15Bala abantwana bakoLevi ngezindlu zaboyise langensendo zabo; wonke owesilisa kusukela kolenyanga kusiya phezulu, uzababala ^l. 16Ngakho uMozisi wababala ngokomlomo weNkosi njengokulaywa kwakhe. 17Lala ayengamadodana kaLevi ngamabizo awo: UGerishoni loKohathi loMerari ^m. 18Lala ngamabizo amadodana kaGerishoni ngensendo zawo: ULibini loShimeyi ⁿ. 19Lamadodana kaKohathi ngensendo zawo: UAmramu loIzihari, uHebroni loUziyeli ^o. 20Lamadodana kaMerari ngensendo zawo: UMahli loMushi ^p. Lezi zinsendo zamaLevi ngezindlu zaboyise.

21KuGerishoni kwakulosendo lwamaLibini losendo lwamaShimeyi; lezi zinsendo zamaGerishoni. 22Ababalwayo babo, ngenani labo bonke abesilisa, kusukela kolenyanga kusiya phezulu, ababalwayo babo babeyizinkulungwane eziyisikhombisa lamakhulu amahlanu. 23Insendo zamaGerishoni zizamisa amathente azo ngemva kwethabhanekele ngentshonalanga ^q. 24Lesiphathamandla sendlu kayise wamaGerishoni sizakuba nguEliyasafi indodana kaLayeli. 25Lemfanelo yamadodana kaGerishoni ethenteni lenhlangano izakuba ^r lithabhanekele ^s, lethente ^t, isifulelo salo ^u, lesilenge somnyango wethente lenhlangano, 26lamakhetheni eguma ^v, lesilenge somnyango weguma elingasethabhanekeleni lelingaselathini inhlangothi zonke ^w, lentambo zalo, ngokomsebenzi walo wonke ^x.

27LakuKohathi kwakulosendo lwamaAmramu, losendo lwamaIzihari, losendo lwamaHebroni, losendo lwamaUziyeli. Lezi zinsendo zamaKohathi ^y. 28Kunani labo bonke abesilisa, kusukela kolenyanga kusiya phezulu, babeyizinkulungwane eziyisificaminwembili lamakhulu ayisithupha, begcina imfanelo yendlu engcwele. 29Insendo zamadodana kaKohathi zizamisa amathente azo eceleni kwethabhanekele ngeningizimu ^z. 30Lesiphathamandla sendlu kayise wensendo zamaKohathi sizakuba nguElizafani indodana kaUziyeli ^aa. 31Lemfanelo yawo izakuba ngumtshokotsho ^ab, letafula ^ac, loluthi lwesibane ^ad, lamalathi ^ae, lezitsha zendlu engcwele abakhonza ngazo, lesilenge ^af, layo yonke inkonzo yalo. 32Njalo umphathi weziphathamandla zamaLevi uzakuba nguEleyazare, indodana kaAroni umpristi; ubuphathi bakhe babukwabagcina ukulindwa kwendlu engcwele.

33KoMerari kwakulusendo lwamaMahli losendo lwamaMushi; lezi zinsendo zamaMerari. 34Lababalwayo babo, ngenani labo bonke abesilisa, kusukela kolenyanga kusiya phezulu, babeyizinkulungwane eziyisithupha lamakhulu amabili. 35Lesiphathamandla sendlu kayise wensendo zakoMerari sizakuba nguZuriyeli indodana kaAbihayili. Bazamisa amathente abo eceleni kwethabhanekele ngenyakatho. 36Lobuphathi bokulinda bamadodana kaMerari buzakuba ngamapulanka ethabhanekele ^ag, lemithando yalo ^ah, lensika zalo ^ai, lezisekelo zalo ^aj, lezitsha zalo zonke, lawo wonke umsebenzi walo, 37lensika zeguma inhlangothi zonke, lezisekelo zazo ^ak, lezikhonkwane zazo ^al, lentambo zazo ^am.

38Lalabo ababemise amathente abo phambi kwethabhanekele ngempumalanga, phambi kwethente lenhlangano, kwakungoMozisi loAroni lamadodana akhe, belondoloza ukulindwa kwendlu engcwele, kusenzelwa umlindo wabantwana bakoIsrayeli ^an. Lowemzini osondelayo uzabulawa ^ao.

39Bonke ababalwayo bamaLevi, oMozisi loAroni abababalayo, ngokomlayo weNkosi, ngezinsapho zabo, bonke abesilisa kusukela kolenyanga kusiya phezulu, babeyizinkulungwane ezingamatshumi amabili lambili ^ap.

Uhlengo lwamazibulo

40INkosi yasisithi kuMozisi: Bala wonke amazibulo esilisa abantwana bakoIsrayeli, kusukela kolenyanga kusiya phezulu, uthathe inani lamabizo abo. 41Uzangithathela amaLevi (ngiyiNkosi) endaweni yawo wonke amazibulo phakathi kwabantwana bakoIsrayeli; lezifuyo zamaLevi endaweni yamazibulo wonke phakathi kwezifuyo zabantwana bakoIsrayeli ^aq. 42Ngakho uMozisi wabala wonke amazibulo phakathi kwabantwana bakoIsrayeli, njengokulaya kweNkosi kuye. 43Lawo wonke amazibulo esilisa, ngenani lamabizo, kusukela kolenyanga kusiya phezulu, kwababaliweyo babo, ayezinkulungwane ezingamatshumi amabili lambili lamakhulu amabili lamatshumi ayisikhombisa lantathu.

44INkosi yasikhuluma kuMozisi isithi: 45Thatha amaLevi endaweni yamazibulo wonke phakathi kwabantwana bakoIsrayeli, lezifuyo zamaLevi endaweni yezifuyo zabo; lamaLevi azakuba ngawami ^ar; ngiyiNkosi. 46Mayelana labazahlengwa, abangamakhulu amabili lamatshumi ayisikhombisa lantathu bamazibulo abantwana bakoIsrayeli ^as, abaphezu kwenani lamaLevi ^at; 47uzathatha lamashekeli* nganhlanu nganhlanu ngekhanda ^au, ngokweshekeli lendlu engcwele uzawathatha ^av; ishekeli lingamagera* angamatshumi amabili ^aw. 48Unike kuAroni lakumadodana akhe imali yabahlengiweyo abasele phakathi kwabo. 49UMozisi wasethatha imali yohlengo kulabo ababesele phezu kwabahlengwa ngamaLevi. 50Wayithatha imali kumazibulo abantwana bakoIsrayeli, amashekeli ayinkulungwane lamakhulu amathathu lamatshumi ayisithupha lanhlanu, ngokweshekeli lendlu engcwele ^ax. 51UMozisi wasenika uAroni lamadodana akhe imali yabahlengiweyo, ngokomlomo weNkosi, njengalokhu iNkosi imlayile uMozisi ^ay.